अनन्तकुमार बस्नेत
टोपी लगाऔँ अति गर्वसाथ
हिमाल झैँ उच्च हुनेछ माथ
श्रीपेच आभूषण सान-मान
नेपालको यो पहिचान जान।
टोपी लगाए दुनियाँ निहार्छ
मुहार हाम्रो झलमल्ल पार्छ
देखेर टोपी अति गर्व लाग्छ
र चित्तमा राष्ट्रिय भाव जाग्छ।
टोपी अहा पूर्वजको चिनो हो
र एकताको बलियो मियो हो
लाइन्न यो तस्विर खिच्न मात्र
सञ्जालमा चर्चित बन्न मात्र।
टोपी अलङ्कार सिँगार हाम्रो
दुरुस्त शोभा शिरपोस हाम्रो
टोपी दिने गर्छ खुदै चिनारी
नेपाल नै बोक्दछ झल्ल पारी।
लाएर टोपी शिर यो सजाऊँ
सम्मान हो इज्जत हो बढाऊँ
यो राष्ट्रको गौरव तोड्नु हुन्न
तसर्थ टोपी अब छोड्नु हुन्न।
