भगवती प्रसाद शर्मा
नयाँ काम थाल्ने नयाँ दृष्टिलाई।
पुराना कुरा हेर्न लायो फिराई।
हिजोआज जस्तो नहोस् भन्छ भोलि।
नयाँ वर्ष आयो नयाँ चेत खोली।।१
चरी कोइलीले नयाँ गीत गायो।
नदी स्वच्छ बग्ने भनी कुल्कुलायो।
युवा जोसिएका भए वक्ष खोली।
नयाँ वर्ष आयो छ यो डाक बोली।।२
म नेपाल बोक्ने भनी चेतनाले।
उठ्यो काम हाम्रो यही भावनाले।
दुखी हुन्न कोही छ सम्पन्न बोली।
नयाँ वर्ष आयो नयाँ जुक्ति खोली।।३
जुनी भव्य पार्ने कुरा हैन काम।
खुबी भित्र जन्मोस् सबैमा तमाम।
दिशा नव्य खोलोस् गुणी वात घोली।
नयाँ वर्ष आयो सबै विघ्न तोडी।।४
पहाडी हिमाली मधेसी सबैमा
हुने एकताले खुशी मिल्छ आमा।
दिई ज्ञान राम्रो रहोस् यो अखण्ड।
नयाँ वर्ष आयो खुलाएर दन्त।।५
