घनश्याम रेग्मी
आमाजस्तो भुवन भरमा उच्च कोही हुँदैन
धारा सङ्लो हृदय रसझैँ शुद्ध अर्को हुँदैन
आमाजस्तो अगम गहिरो प्रेम कोही दिँदैन
आमाभन्दा प्रिय पद कुनै विश्वमा पाइँदैन ।।
आमाजस्तो ललित मनको देव अर्को हुँदैन
आमाजस्तो मन मुटु दिने दातृ कोही हुँदैन
आमा पाए धन र सुविधा अन्य क्यै चाहिँदैन
आमाभन्दा प्रिय पद कुनै विश्वमा पाइँदैन ।।
आमाजस्तो नजिक रहने व्यक्ति कोही हुँदैन
छोराछोरी जति पनि भए भेद केही हुँदैन ।
आमाजस्तो परम पद यो जन्ममै पाइँदैन
आमाभन्दा प्रिय पद कुनै विश्वमा पाइँदैन ।।
लाखौं बाधा प्रशव दिनका बिर्सिई हाँस्न सक्ने
आफू भोकै तर शिशु यिनै हार्दमा टाँस्न सक्ने
आफ्नै ठान्छिन् प्रगति शिशुको शुल्क भो चाहिँदैन
आमाभन्दा प्रिय पद कुनै विश्वमा पाइँदैन ।।
आमालाई नमन छ सधैँ भन्छ यो लेखनीले
राखौँ आमा हृदय पटमा प्रेम गर्दै सबैले
आमाजस्तै मुलुक गर लौ भेद केही हुँदैन
आमाभन्दा प्रिय पद कुनै विश्वमा पाइँदैन ।।
