लिला पण्डित(के.सी)
घुम्दै र फिर्दै आइपुग्यो फूलको चाड तिहार
फर्केर आँउछन् परदेशी सम्झेर आफ्ना पियारा
कलकल गर्दै मिठो धुन गाउँछन् खोला, नालाले
झलमल घर, मन्दिर बनाउँछन दियो र पालाले।
खेतैमा ढाक्यो छपक्कै मार्सी धान झुलेर
बारीमा ढाक्याे ढपक्कै सयपत्री फूल फुलेर
हाँस्न थाले जून,तारा हट्यो कालो बादल
नाँच्न थाल्यो मन सारा घन्काइ जोर मादल।
लिङ्गे, रोटे पिङ्ग पनि मच्चिराछन् डाँडामा
पशु, पन्छी,भाइ पुजा हुन्छ यसै चाडमा
सप्तरङ्गी टीकाले पुज्छिन् चेली दाजुभाइ
उमङ्ग,हर्ष घोलेर मनाउँछन् चाड तिहारलाइ।
