टिका शिवाकोटी आचार्य
किताबमा जोगिको परिचय पढेर नातिले भन्यो- “हजुरबा! जोगीको बारेमा अरु केही भन्नू न !”
नातिले आफ्नो संस्कृतिको बारेमा बुझ्न खोजेको देखेर खुसी हुँदै हजुरबुबाले भन्नुभयो -” जोगीहरू कालो गोलेसो झुन्ड्याउॅदै कार्तिक र चैत दुई पटक सम्म सिधा उठाउँदै बिहान बिहान घर घरमा आउँथे अनि रातमा फेरी लाउँथे ।घरको चार सुरमा, मुल ढोका र घरभित्रको मुल बीचको थाममा उभिएर फुक्ने गर्दथे । ”
नातिले नबुझेर सोध्यो -“किन त्यसरी फुकेको हजुरबा?”
हजुरबाले भन्नुभयो – “परिवारमा रोग व्याधा नलागोस र ग्रहदशाहरु टरेर जाने, घरमा सहले बास गर्ने धार्मिक विश्वास थियो त्यसैले ।”
नातिले खुशी हुँदै भन्यो – “आहा! कति राम्रो संस्कृति अनि संस्कृतिका कति धनी हामी ।”
नातिले फेरि सोध्यो -“अनि अचेल किन जोगी आउँदैनन् त हजुरबुबा ? खै ,म त कहिले देख्दिन त ?”
हजुरबाले खुइय सुस्केरा हाल्दै भन्नुभयो -“जोगीहरु अचेल बाघको आँखा अघिको मृग जस्तै भएका छन् बाबू ।”
