मोती जयन्तीको संस्मरणमा
शोभा कोइराला
छन्द:- इन्द्रवज्रा
मोती तिमीले पसिना बगायौ
सत्सिर्जनाको गरिमा बचायौ
तिम्रा अनौठा गुण गाउँदै छौँ
सम्मानका पुष्प चढाउँदै छौँ।
विद्वत् सभामा खुब हुन्छ चर्चा
मोती विनाको नत हुन्छ अर्चा
सत्सिर्जनामा मन लाउँदै छौँ
सम्मानका पुष्प चढाउँदै छौँ।
पीयूष मीठो मधुझैँ पिलाई
साहित्यलाई जनमाझ ल्याई
शृङ्गारका काव्य सिकाउँदै छौँ
सम्मानका पुष्प चढाउँदै छौँ।
त्यो दिव्य गङ्गा तनमा मिलाई
उत्साहको दीपक बाल्नलाई
सद्भावनासाथ उदाउँदै छौँ
सम्मानका पुष्प चढाउँदै छौँ।
स्रष्टा विवेकी भवमा बनाइ
साहित्यको फाँट उँचो गराइ
ती सिर्जना आज उठाउँदै छौँ
सम्मानका पुष्प चढाउँदै छौँ।
