रामप्रसाद पन्थी
रेसुङ्गा न.पा २ तम्घास, गुल्मी
एकादशी व्रत बस्ने किन हाेला आमा ?
उता म त भाेकै बस्छु भन्नू हुन्छ मामा।
एकादशी व्रत बसे धर्म हुन्छ नानी
व्रत बस्ने पूजा गर्ने राम्राे हाे नि बानी।
आमा अनि मामाबाट कुरा बुझेँ धेरै
एकादशी व्रत बस्न किन गर्थेँ बेरै।
नुहाएर चाेखा लुगा लगाएर फेरी
मठ चाेखाे पार्नु थियाे किन बस्थेँ हेरी ?
तुलसीकाे मठ लिपी सफा चट्ट गरेँ
निगालीकाे लिगाे गाड्दा भाइ दङ्ग परे।
फूल माला थरी थरी झिलीमिली भयाे
तुलसीकाे बिहे भन्दा खुसियाली छायाे।
दिनैभर निराहार हामी भाेकै बस्याैँ
बेलुकीमा पूजा गर्न सबै कम्मर् कस्याैँ
जल खाई तुलसीकाे विहे पनि भयाे
मानेँ मैले एकादशी महत्वकाे छ याे।
साँझपख कन्दफूल फलफूल खायाैँ
रातैभर नारायण भक्ति गीत गायाैँ।
छाड्नु हुन्न धर्म कर्म भुल्नु हुन रीति
सबै मिली बसाउनु पर्छ आफै थिति।
