शुक्रराज कुँवर
धरान १०
दश कक्षा अध्ययन गर्दै गरेका जीवन र प्रकाश मिल्ने साथी थिए । जीवन सरल एवम् मेधावी छात्र थिए भने प्रकाश गुण्डागर्दीमा अग्रसर हुने झगडालु स्वभावको थियो ।
प्रकाश आफ्नो स्वभाव अनुसार पढन सकेन । उसले दशम कक्षा पनि पूरा नगरी बिचैमा पढाइ छोडिदियो । तर जीवन आफ्नो पढाइमा विशिष्टता हाँसिल गर्दै विदेशी भूमिबाट आफूलाई उर्जा विज्ञको रुपमा स्थापित गराउन सफल भयो ।
विदेशमा विभिन्न परियोजनाहरुमा काम गर्दा जीवनलाई प्रकाशको सम्झना आउने गर्दथ्यो । बिचरा ! दश कक्षा पनि पास गर्न सकेन , के गर्दै होला भन्ने लाग्दथ्यो । प्रकाश राजनीतिमा लाग्या छ रे, कुनै राजनीतिक पार्टीको झोले भएकोछ रे ,भन्ने सम्म उसले सुनेको थियो ।
जीवन अत्यन्त हर्षित थियो । आफ्नै देशले शुभारम्भ गर्न लागेको उर्जा सम्वन्धी एउटा वृहत परियोजनामा उर्जा विज्ञको रुपमा ऊ नियुक्त भएको थियो । आयोजकहरुले परियोजना शुभारम्भका लागि भव्य कार्यक्रमको आयोजना गरेका थिए ।
कार्यक्रम स्थल खचाखच थियो र त्यहाँ अन्य क्षेत्रका विज्ञहरुको पनि बाक्लो उपस्थिति थियो । सबैजना प्रमुख अतिथिको व्यग्र पर्खाइमा थिए । ढिलो गरेर प्रखुम अथितिको आगमन भयो जसलाई देखेर जीवन तीन छक परे । उसलाई उसको विज्ञताले गिज्याए जस्तो लाग्यो । उफ…! राजनीति ! उसको मुखबाट वितृष्णायुक्त शब्द निस्कियो । ती प्रमुख अथिति अरु कोही नभएर उसकै साथी , उर्जा मन्त्री प्रकाश थिए ।
