“किताब देऊ”

टिकाराम शर्मा पौडेल

किताब पाएर पढी रमाएँ ।
र कल्पनाका सित उड्न पाएँ ।।
कथा नि पाएँ कविता नि पाएँ ।
र गीत सङ्गीत सचित्र पाएँ ।।

हात्ती र घोडा पनि चढ्न पाएँ ।
समुद्र-प्राणीसित खेल्न पाएँ ।।
हराभरा जङ्गल दौडँदै छु ।
नदी र नालाबिच पौडँदै छु ।।

किताबले दिन्छ चुनेर लिन्छु ।
बसी बसी विश्व फनक्क घुम्छु ।।
म कल्पनाको पुतली बनेर ।
फर्कन्छु आफ्नै गुँड सम्झिएर ।।

आऊन् समस्या अब जुध्न सक्छु ।
मिलीजुली सिर्जन गर्न सक्छु ।।
किताब आमासरि साथमा छ ।
अज्ञान-मैलो अब खै कहाँ छ ??

किताब जस्तो कुन हुन्छ साथी ?
तिमी हुँदा चढ्दछु माथि माथि ।।
त्यसै हुँदा पढ्छु किताब देऊ !
खुसी भई बढ्‌छु किताब देऊ !!