देव भट्टराई
छ जो धीर-रोही उही पुग्छ माथि ।
यही रीत संसारको हुन्छ साथी ॥
छली-छात्रले उच्च-चूली छुँदैन ।
अहङ्कारको आयु लामो हुँदैन ॥
रिसायो कहाँ दैव पूजा नगर्दा ?
भनी भक्त ठूलो फुलेको छ मुर्दा ॥
जहाँ हेरिनेगर्छ श्रद्धा छ छैन ।
अहङ्कारको आयु लामो हुँदैन ॥
ठगी चाल देखी छली-बन्चरेको ।
बडो ! मुस्कुरायो खुदै देउता ओ ॥
सदाचार यो खेलिने खेल हैन ।
अहङ्कारको आयु लामो हुँदैन ॥
यहाँ होडमा छन् धनी बन्न जोगी ।
दबा दिन्छ आफैँ बनाएर रोगी !!
छ नि:शुल्क अर्ती सिटामोल छैन ।
अहङ्कारको आयु लामो हुँदैन ॥
भन्यौँ झट्ट हेरी कुनै फूल राम्रो ।
यही धारणाले पिछा गर्छ हाम्रो ॥
गुण स्वाद बास्ना जहाँ हेरिँदैन ।
अहङ्कारको आयु लामो हुँदैन ॥
न थाहा छ केही हुँ आकाश भन्ने ।
उही एक मात्रै छ यो विश्व थाम्ने ॥
छुसी छुद्रतारा टिकीराखदैन ।
अहङ्कारको आयु लामो हुँदैन ॥
