अन्जु चालिसे रूपान्जली
आँगनभरि फूल फुले,
घरैभरि बास्ना।
आमाको हातको सेलरोटी,
दशैँको मिठो सम्झना।
रातो टीका, पहेँलो जमरा,
नयाँ लुगा लाउँछु।
हजुरबाको आशीर्वादले,
मनभरि खुसी सँगाल्छु।
लिङ्गे पिङको मच्चाइसँगै,
आकाश छुने रहर।
साथीभाइको हाँसोले नै,
रमाइलो हुन्छ सहर।
टाढा गएका आफन्तहरू,
घरमा फर्की आउँछन्।
मायाका ती मीठा कुराले,
मनका दूरी मेटाउँछन्।
दक्षिणाभन्दा प्यारो लाग्छ,
आफन्तको त्यो माया।
सबै मिली रमाउँदाखेरि,
उज्यालिन्छ घरको छाया।
दशैँ तिमी पर्व मात्रै होइनौ,
मिलनको मीठो बहार। माया,
सद्भाव बाँड्दै आऊ,
हरेक घरमा बारम्बार।
दशैँ आयो, खुसी छायो,
मनमा नयाँ उमङ्ग।
माया बाँडी, खुसी साटी,
मनाऔँ दशैँसँगै सङ्ग।
