अवतार ढकाल
‘म्याम भुत हुन्छ कि हुँदैन् ?´ कक्षामा अर्कै विषयबस्तु पढाइरहेकी रेनुका मिसलाई सजलले सोध्यो।`हुँदैन।´ रेनुकाले उत्तर दिइन्।
`उसले पत्याएन तर पनि चुप लाग्यो।
`अनि बोक्सी नि म्याम?´ सरिनाले अर्को प्रश्न तेर्स्याइ।
`हुन्न।´ उनले एक शब्दमा जबाफ दिइन्।
`भुत, प्रेत, बोक्सी….यी सब अन्धविश्वास हुन। हामी अन्धविश्वासको पछि लाग्नु हुँदैन।´ उनले सम्झाउँदै भनिन्।
कक्षामा एकछिन खासखुस चल्यो। विद्यार्थीहरू एकअर्कालाई हेरेर मुखामुख गर्न लागे।
एकछिन पछि उनकै छिमेकमा बस्ने एउटी नानीले प्रश्न गरिन,
`अनि म्याम हिंजो तपाईँको घरमा किन चिन्ता राखेको ?´
रेनुकाले केहि बोल्नै सकिनन्। कोठाभरी हाँसो गुन्जियो।
`चुप लाग। हल्ला नगर। जाँचमा आयो भनें `हुँदैन´भनेर लेख्नु पर्छ।´उनले अलिक सानो स्वरमा भनिन्।
