मणि भट्टराई
गठ्ठाघर,भक्तपुर
हालः न्यूजील्याण्ड
पुतली ओ पुतली
सानी सानी पुतली
आँगनमा आउँछौ
मिल्ने सँगी साथली।
पहेँली र पातली
दुई पङ्ख उचाली
फिर्फिर गर्दै उड्छौं
कोमलाङ्गी चञ्चली।
चट्ट जिउ परेकी
स्वर्ग बाट झरेकी
कसैलाई खोजे झैँ
एता उता गरेकी।
अनेक दुःख सहेर
सुन्दर रूप पाएर
दङ्ग तिमी पर्दिहौ
आफ्नै रूप देखेर।
बगैंचामा पसेर
फूल सँग बसेर
रमाउँदै निस्कन्छौ
मिठो रस चुसेर।
बादलमा पुगेर
एकै छिन लुकेर
मुस्कुराउँदै आउँछौ
धर्तीलाई सम्झेर।
कहिले पर जान्छौ
कहिले वर हुन्छौ
जिस्के जस्तो गरेर
हामी सँगै रम्छौ।
प्रकृति सँग झुलेर
नाच्छौ तिमी खुलेर
आनन्दले रमाउँछौ
दुनियाँलाई भुलेर।
हजारौं रङ्ग तिम्रा
सबै लाग्छन् राम्रा
प्रकृतिको अनुपम
उपहार हौ हाम्रा।
