अनन्तकुमार बस्नेत
हे ! पृथ्वी अति वीर धीर मनका उत्साहका भूपति
टुक्रेका गणराज्य एक बनिए पाएर तिम्रो गति
देख्यौ मार्ग सफा भविष्यतिरका हौ स्वप्न द्रष्टा तिमी
उच्चा साहस हौसला सँग बन्यौ नेपाल स्रष्टा तिमी।
गोर्खाली जनमा दियौ गहकिलो सन्मार्ग निर्देशन
फाटेका मन जोड्न नित्य कसियौ हौ एकताका मन
कास्की लम्जुङ गोरखा तिर घुमी बुझ्ने गर्यौ हालत
पीडामा जन देखिए तब भयौ अत्यन्त मर्माहत।
थुप्रै राज्य थिए यही मुलुकमा यौटा बनाऊँ भनी
जोहो शस्त्र र अस्त्रको पनि गर्यौ बन्नैछ योद्धा भनी
उम्दा राय लिई उता पर गयौ काशी पुग्यौ भूपति
ल्यायौ बारुद साथ बन्दुक सयौँ तर्वार चाहे जति।
देखी कान्तिपुरी सुरम्य नगरी उम्दा इरादा लियौ
त्यो चन्दागिरिमा बडो कठिनले सेना लिई उक्लियौ
टेकी भव्य उपत्यका शहरमा कब्जा गर्यौ कष्टमा
सिङ्गो देश बनाउने रहरमा होम्मेर सङ्कष्टमा।
हे ! पृथ्वी अहिले कुपात्र जनले टुक्रयाउँदै छन् थल
यस्तो लाग्दछ यो महा मुलुकले भोग्दै छ घाती पल
आऊ जन्म लिएर भूमितलमा भन्दै छ यो देशले
यो नेपाल रहन्न झैँ छ पृथिवी खोज्दै छ यो देशले।
