आफ्नै पाइला

माहेश्वरी भट्ट
कञ्चनपुर

राजु बचपनदेखि नै किताबहरूमा हराउँथे। उनी ज्ञान खोज्दै पाना पल्टाउँथे, तर बाहिरी संसारसँग धेरै घुलमिल हुन्नथे। उनलाई लाग्थ्यो, किताबले नै सबै सिकाउँछ।
एकदिन उनले ‘सफलताको रहस्य’ भन्ने पुस्तक पढे। पुस्तकले लेखेको थियो— “ठूलो व्यवसायी बन्न परिश्रम, धैर्य र अनुभव आवश्यक हुन्छ।”
राजु उत्साहित भए। उनले आफ्नै व्यवसाय खोल्ने सोच बनाए। तर केही महिनामै व्यवसाय डुब्यो। उनी निराश भए।
त्यही बेला उनका हजुरबुबाले सोधे, “के भयो राजु?”
राजुले जवाफ दिए, “मैले किताब पढेर व्यवसाय सुरु गरेँ, तर असफल भएँ।”
हजुरबुबाले मुस्कुराउँदै भने, “पुस्तकमा बाटो लेखिएको हुन्छ, तर त्यो बाटोमा कसरी हिँड्ने भन्ने त आफ्नै अनुभवले मात्र सिकाउँछ।”
राजुलाई महसुस भयो— किताबले ज्ञान दिन्छ, तर सफलता अनुभव र प्रयासले मात्र सम्भव छ। त्यसपछि उनले आफ्ना गल्तीहरूबाट सिक्दै, पुनः मेहनत गर्न थाले।