“युवाशक्ति”

शोभा कोइराला

युवा हुन् देशका तारा युवा हुन् देशका प्यारा
न होऊ है युवा हाम्रा अरूका देशका प्यारा
तिमीले देश छाडेमा धराको नाम मेटिन्छ
युवाको शक्तिले मात्रै धराको रूप फेरिन्छ।

जुटाऊ पाखुरा तिम्रा स्वदेशी भूमिका लागि
नजाऊ दूर नेपाली युवा हे श्वासका माली
उज्याल्ने हो धरा आफ्नै त्यसैले क्रान्ति चाहिन्छ
युवाको शक्तिले मात्रै धराको रूप फेरिन्छ।

पढी लेखी धरालाई उठाऊ ज्ञान झाँगिन्छ
नयाँ ऊर्जा लिई हिँड्दा बिहानी घाम झुल्किन्छ
गरे सङ्घर्षले केही धरा यो खास देखिन्छ
युवाको शक्तिले मात्रै धराको रूप फेरिन्छ।

प्रभाको घामका भाँती युवामा तेज देखिन्छ
युवाको कर्मले मात्रै सुनौलो नाम लेखिन्छ
त्यसैले देशलाई झन् युवाको साथ चाहिन्छ
युवाको शक्तिले मात्रै धराको रूप फेरिन्छ।

युवा हे चेतना छर्दै नजाऊ दूर जागेर
बचाऊ राष्ट्रलाई झन् विदेशी मार्ग त्यागेर
बनाएमा युवाले नै धरा यो स्वर्ग भैदिन्छ
युवाको शक्तिले मात्रै धराको रूप फेरिन्छ।