व्यस्तता

कल्पना मरासिनी
भूमिकास्थान ९ अर्घाखाँची
हाल ललितपुर

“कसैलाई नबाँडी राम्रोसँग खानु नी” चाउचाउको प्याकेट छोराको झोलाभित्र घुसार्दै रमा बोलिन्। “हुन्छ आमा” भन्दै छोरा स्कुल बसमा चढ्यो । त्यसपछि रमा हतार हतार घर फर्किन् र सोफामा अडेस लागेर टिकटक, फेसबुक र युट्युब हेर्न थालिन्। हेर्दा हेर्दै १२ बजिसकेछ। उता भान्छामा खानामाथि झिङ्गा भन्किरहेका थिए। उनलाई खान मन लागेन र बट्टाबाट दालमोठ र चिउरा निकालेर पेट भरिन्।
साँझ छोरा स्कुलबाट फर्कियो। “आमा भोक लाग्यो , के खाजा पकाउनु भएको छ ?” यो सुन्नासाथ उनी रिसाउँदै बोलिन् , “आफूलाई दिनभरि फुर्सद भए पो त पकाउनु। जाऊ ,पसलबाट चाउचाउ र बिस्कुट किनेर ल्याएर खाऊ ।” छोराको हातमा पैसा थमाउँदै उनी बोलिन्। छोरा पसलतिर लाग्यो । ऊ फर्केर आउँदा आमा अझै व्यस्त देखिन्थिन्, उही मोबाइल फोनमा।