स्वीकार्नुहोस् यो नम:

आत्मराम न्यौपाने

जल्ले बाँड्नुभयो प्रकाशित दियो सद्ज्ञानको चेतको
जल्ले मेट्नुभयो घनान्ध मनको अज्ञान सङ्केतको
जल्ले हर्नुभयो कुबुद्धि ननिको नासेर कालो तम
त्यस्ता श्री गुरुवर्गले म शिशुको स्वीकार्नुहोस् यो नम:।१

जल्ले दु:ख सही परिश्रम गरी खाई नखाईकन
सच्चा ज्ञान मिठा मिठा दिनुभयो निर्धक्क आजीवन
जल्ले फाल्नुभयो मभित्र निशिको कालो अँध्यारोपन
त्यस्ता श्री गुरुवर्गले म शिशुको स्वीकार्नुहोस् यो नम:।२

जल्ले देख्नुभयो दया र करुणा आँखा दुईमा सदा
जल्ले पाठ चुनी पढाउनुभयो द्रष्टा बनी सर्वदा
जल्ले जीवनका कला दिनुभयो जम्मै मिलाई क्रम
त्यस्ता श्री गुरुवर्गले म शिशुको स्वीकार्नुहोस् यो नम:।३

मर्नैपर्छ मरिन्छ मानव जुनी मर्ने न हो आखिर
बाँच्दा अन्तिम सास पोखिन पुगोस् यो राष्ट्रकै खातिर
जल्ले भन्नुभयो सिकाउनु भयो आदर्श यो कञ्चन
त्यस्ता श्री गुरुवर्गले म शिशुको स्वीकार्नुहोस् यो नम:।४