अपराध

तुलसी पण्डित

आमा साथीहरुले मेरो कपाल तानेर हैरान बनाएका छन्। हिड त बजार कपाल काट्न।
छोरीले भनी।
“आमा मेरो पनि बजारमा काम छ ? म पनि तपाईँहरु सँगै जान्छु।”
“ल हिड त चाँडै गरेर घर आउनु पर्छ।”
“ल आउँ बाबु यो कुर्सीमा बस। अब म तिमीलाई कपाल काटेर राम्रो बनाइ दिन्छु । लामो कपाल बनाएर पाल्यो भने साथीहरुले पनि भुतल्छन् ।”
हजामले “भुतल्छन् ” भनेको शब्द सुनेर छोरी झस्किन् । उनले घरमा हुने बाबु आमाको झगडा सम्झिन् । बाबु भन्दा आमा धेरै बलियो थिइन् । तर झगडा हुँदा बाबा आमाको कपाल समात्न पुग्थे । झगडा बढ्दै जान्थ्यो । पिटापिट चल्थ्यो । तर लामो कपालले गर्दा जहिले पनि आमाको हार हुन्थ्यो । यो घटना सम्झदा उनको अनुहारमा एक्कासी परिवर्तन आयो।
उनले भनिन्।
“आमा म कापी किनेर आउँछु है ? ”
कपाल काटेको पैसा बुझाएर आमा बाहिर निस्कनु भयो । छोरी हाँस्दै आइपुगिन् ।
“होइन छोरी तिमीले यो के गरेको ? विवाह गर्ने बेलाको छोरी ?”
“आमा म कपाल काटेर झन् राम्री भएकी छु ।”
“अँ भएकी छस् राम्री । छोरी मान्छेको सौन्दर्य नै कपाल हो । सौन्दर्य नै गायव पारेपछि राम्रो हुन्छ ?” “आमा सौन्दर्यको नाममा आफैँ असुरक्षित भएर बस्नु अपराध हो ?”