शोभा कोइराला
सारा नाता लाग्छ जस्तै अजान
आमा भन्दा हुन्न उस्तै समान
पृथ्वी जस्तै मातृवात्सल्य दाता
आमा नै हुन् सृष्टिकर्ता विधाता ।१।
आमा जस्तै हुन्न कोही जगत्मा
आमा जस्तै हुन्न कोही विपद्मा
न्यानो न्यानो काखकी हुन् प्रदाता
आमा नै हुन् सृष्टिकर्ता विधाता ।२।
आफ्ना सारा दु:खलाई छिचोल्दै
सच्चा सेवा गर्दछिन् प्रीत घोल्दै
शिक्षादाता प्रेरणायुक्त आशा
आमा नै हुन् सृष्टिकर्ता विधाता ।३।
काला बैरी कालकी अग्निशाला
घातीलाई ध्वस्त पार्ने निकासा
आँधी निल्ने मातृका जन्मदाता
आमा नै हुन् सृष्टिकर्ता विधाता ।४।
सारा इच्छा त्याग्दछिन् बारबार
पाखण्डीमा बन्दछिन् सूत्रधार
झर्ना जस्तै निर्मला हुन् सुजाता
आमा नै हुन् सृष्टिकर्ता विधाता ।५।
