“असार र गीत”

घनश्याम रेग्मी

खेतको बाँझो खनेर
बाउसे हली बनेर
दिलको गरा सम्याई
गरौँ लौ धान रोपाइँ

पानीको धारो कल्कल
माटो र पानी छल्बल
तारे र माले हाँकेर
कर्मका द्यौता भाकेर
छेउ र कुना खोपेर
एउटा बीउ रोपेर
मानोले मुरी फलाऊ
भविष्य खेती फलाऊ
किसानी पेसा चोखो छ
पेटको सधैँ भोको छ
बाँडेर खान्छ सबैमा
गर्दछ गर्व यसैमा
कोमल हात चल्दछन्
कर्मको भाव बोल्दछन्
असारे भाका गाएर
मनको भाव घोल्दछन् ।