आमाको माया

रमेशचन्द्र घिमिरे
भोर्लेटार, लमजुङ

क-क-न-न भनेर मीठो बोल्न सिकाउँछिन्
हात समाई बिस्तारै ताते-ताते गराउँछिन्
मलाई मेरी आमाले अघि-अघि बढाउँछिन्
ममताकी खानीको सधैँ पाउ पर्छु म
मेरी आमा तिमीलाई धेरै माया गर्छु म !

तारा बाजी भनेर गीत गाउन सिकाउँछिन्
फुकाएर पुस्तक क ख ग घ पढाउँछिन्
मलाई गुरु आमाले अघि-अघि बढाउँछिन्
अक्षरका बिउ यी पानाभरि छर्छु म
गुरु आमा तिमीलाई धेरै माया गर्छु म !

नेपाली हुँ भनेर गर्व गर्न सिकाउँछिन्
मेचीदेखि कालीको छातीभित्र अटाउँछिन्
मलाई नेपाल आमाले अघि-अघि बढाउँछिन्
चोट लागे कुनै दिन तिम्रो दुःख हर्छु म
नेपाल आमा तिमीलाई धेरै माया गर्छु म !