“आरीघोप्टे पानी”

गंगा खड्का
बूढानीलकण्ठ ,काठमाडौँ

वर्षा र शरदको झैझगडा पर्यो कि
न मौसमले सबैलाई चुनौती पो गर्यो कि
अविरल पर्यो पानी असोज मासमा
कति बेर बस्ने होला पानी टर्ने आशमा।

बाटोघाटो हिँड्नलाई पर्यो अप्ठ्यारो
काममा जाने कामदारलाई झनै चटारो
छाता ओढी हिँड्न पनि पानी छेक्दैन
लौ न किन यो पानीले आँखा देख्दैन।

अतालिए गाईभैंसी बसी गोठमा
हाँसो छैन कसैको अहिले ओठमा
डुबानमा पर्नेहरू कायल हुँदै छन्
लालाबाला आँत्तिएर बरा रुँदै छन्।

चरीबरी चारो टिप्न सकेनन् नि जान
कठै ! तिनले केही नि पाएनन् खान
सुसाउँदै खोलानाला उर्लिँदै छन् अति
जताततै पुराएर अपुरणीय क्षति।

दिनमै भयो अन्धकार परेजस्तै रात
किन होला दैवले गरे यत्रो घात ?
आरीघोप्टे पानीले सातोपुत्लो लियो
बर्खामास सकिँदा नि अझै सास्ती दियो।