मधुसूदन पराजुली मानव
काभ्रे
“हामी दलित हामीले छोएको पानी खान हुन्न रे ! के हामी दलित हौँ ?”
खुल्ला सडकमा दलित समुदायका नायक राम दर्जी भाषण दिँदै थिए।
दलित समुदायका हकहितको संरक्षण गर्न उनी लडिरहेका थिए ।
उनको हातमा “दलितलाई खै त” लेखिएको साइनबोर्ड थियो।
उनको वरपर पत्रकार जम्मा भएका थिए । त्यसैले बीचका एक पत्रकारले सोधे ।
के तपाईँ साँच्चै दलित हो ?
“होइन। हामी कदापि दलित थिएनौँ । हाम्रै कलाबाट हिजोका मानिसले लत्ता कपडा पाएका थिए। हामी कसरी दलित हुन्छौँ ।”
राम दर्जीले गर्वसाथ जवाफ दिए।
“दलितलाई खै त” यो साइन बोर्डले तपाईँकै बिरोध गर्दै छ तपाईँलाई गिज्याइरहेको छ के भन्न चाहनुहुन्छ ? पत्रकारले पुनः प्रश्न गरे।
राम दर्जी अवाक्।
