गरिबको दसैँ

सेविका रानाभाट
बाङ्ग्रेबेसी, लमजुङ

बिहान बेलुका छाक टारी
गाह्रो पर्छ खुवाउनलाई
फेरि आयो पापी दसैँ
गरिबलाई रुवाउनलाई

चाड आउँदा धनीलाई
कति खुसी लाउँदो हो !
गरिबलाई लाग्छ होला
चाड किन आउँदो हो

मासु किन्ने पैसा छैन
गरीबको मन रुँदो हो !
के खुवाएर बालबच्चा
खुसी पारौँ हुँदो हो

सबैका घरमा दसैँ आयो
मन सारै अत्याउने
ऋण खोज्न गरिबलाई
छैन कोही पत्याउने

सबले राम्रो लाउँदा खेरी
मन हुँदो हो खिन्न
गरिबभन्दा धनीको
चाड हुँदो रहेछ भिन्न।

श्रोतः नेपाली बालसाहित्य