“तीज”

देव भट्टराई

हाम्रो प्यारो तीज आयो घुमेर।
हाँसौँ खेलौँ कर्मलाई चुमेर ।।
साथीसङ्गी नाच्न आओ रमेर।
मीठा मीठा चीज खाँऔँ जमेर ।।

कस्ता कस्ता दु:ख पीडा सहेर ।
भेला भा’छौँ आज हामी सबै र ।।
यस्तो मौका फेरि यो आउँदैन ।
हाँस्ने नाच्ने जिन्दगी पाउँदैन ।।

वर्षा मेला काम सारा भुलेर ।
नाच्ने नै हो आज हामी खुलेर ।।
साडीचोलो लाउने हो चिटिक्कै ।
कान्छीनानी घाँगराले रिटिक्कै ।।

प्यारो लाग्ने माइती गाउँ धेर ।
चाहेमात्रै पुग्न लाग्दैन बेर ।।
जन्म्यौँ हुर्क्यौँ लाग्छ मायाँ उतैको।
आमाबाबा भाइ बैनी सबैको ।।

नारीमैत्री चाड हो एक हाम्रो ।
छाडा बन्दा लाग्छ धेरै नराम्रो ।।
जोगाएमा धर्म संस्कारलाई ।
सक्छौँ हामी शानले बाँच्नलाई ।।

भावी पुस्ता देशलाई उचाल्न ।
छाडा बन्दै हुन्न आफैँ बिगार्न ।।
राखौँ आफ्नू सभ्यताको चिनारी ।
आहा ! आहा !! भव्य नेपाल नारी ।।