“सहयोग गरौँ”

शोभा कोइराला

सहर छैन उजाड भयो स्थिति
कहरमा असरल्ल छ बेथिति
विरहनिम्ति सदा जसरी जुटौँ
विवश छन् सहयोग छिटो गरौँ।

छ विकराल बिहाल जताततै
अभयले भय बढ्छ जताततै
मनुज हे! उपकारकमा उठौँ
विवश छन् सहयोग छिटो गरौँ।

त्रसित छन् प्रिय मानव औ चरा
शिथिल छन् सब बोट जरा जरा
जहर खान त बाध्य भए बुझौँ
विवश छन् सहयोग छिटो गरौँ।

सहनु मात्र उपाय भयो अति
प्रसव पीडित छन् कतिका कति
समयमै उपचार जुटी गरौँ
विवश छन् सहयोग छिटो गरौँ।

नियत छन् अति घातक राखमा
दनुज छन् अति पातक पापमा
मनुजको अब रक्षणमा पुगौँ
विवश छन् सहयोग छिटो गरौँ।