नयाँ बीउ

विवेक शर्मा गौतम
टोखा-३ काठमाडौं

भाषण र राष्ट्रिय गानको आवाजले वातावरण गुञ्जायमान छ।
काठमाडौंको टुँडिखेलमा ठूलो भीड लागेको छ। कार्यक्रममा बाजे विजयवीर नाति अनमोलसँग उपस्थित छन्। अनमोलले पहिलोपटक सहिद दिवसको बारेमा सुनेका हुन्।
“बाजे, सहिद भनेको के हो?” अनमोलले बाजेलाई प्रश्न गर्यो।
विजयवीर एकछिन मौन भए। आँखा टाढा कतै अतीतमा हराएजस्तो देखिन्छन्। “सहिद भनेका ती हुन्, जसले आफ्नो प्राण देशका लागि उत्सर्ग गरे। हामीले आजको यो स्वतन्त्रता, यो सम्मान उनीहरूको बलिदानकै कारण प्राप्त गरेका हौँ।”
“उनीहरू किन मरेका त?” अनमोलले अझ जिज्ञासु भएर सोध्यो।
“त्यस समय हाम्रो देशमा अन्याय र दमन थियो। बोल्ने स्वतन्त्रता थिएन। तर ती सहिदहरू डराएनन्। उनीहरू उठे र आफ्ना जनताको अधिकारका लागि लडे।”
विजयवीरको आवाज भारी भयो। उनले टुँडिखेलको एउटा कुनामा ठड्याइएको शालिकतिर इशारा गर्दै भने, “उनीहरूकै बलिदानका कारण हामी आज स्वतन्त्र छौँ। त्यसैले यो दिन उनीहरूको सम्झनामा समर्पित छ।”
अनमोलले ध्यानपूर्वक शालिक हेर्दै भन्यो, “बाजे, म पनि ठुलो भएर देशका लागि केही गर्छु।”
विजयवीरको अनुहारमा गर्वको झल्को आयो। उनले नातिको टाउकोमा हात राख्दै भने, “त्यो भन्दा ठूलो योगदान केही हुन सक्दैन। सहिदहरूको बलिदानको अर्थ बुझेकोमा म खुसी छु।”
त्यस दिन देखि अनमोलका मनमा देशभक्तिको एउटा नयाँ बीउ रोपिएको छ।