नाग देवता

रामप्रसाद पन्थी
रेसङ्गा न पा २ , गुल्मी

“हजुरबा! किन आज सर्पकाे पूजा गरेकाे?”
नाति रूपेशकाे प्रश्नकाे जवाफ दिदै मनाेहर भने -“बाबू ! आज नागपञ्चमी हाे । त्यसैले नागदेवताकाे पूजा गरेकाे हाे।”
रूपेशले भन्याे, “कति मानिस सर्पकाे टाेकाइबाट मरेका छन्। आफू खाने शत्रुलाई पूजा किन गरेकाे त हजुरबा?”
रूपेशलाई सम्झाउदै मनाेहरले भने, “बाबू रूपेश ! नाग शत्रु हाेइनन् मित्र हुन् । नागले किसानका शत्रुजीव नष्ट गर्नमा सहयाेग गर्दछन्।”
रूपेशले साेध्याे -“नाग मानिसका मित्र पनि भन्नुहुन्छ देवता पनि भन्नुहुन्छ मैले कुरा बुझिन नि हवुरबा!”
मनाेहर -“हेर बाबू ! जसले हरहमेसा साथ दिन्छ त्याे साथी हाे। नागले वातावरण सन्तुलित बनाएर हाम्राे साथ दिएका छन्। धार्मिक हिसाबले हेर्दा शेष नाग भगवान् विष्णुका साथ रहन्छन्। शिवजीका गलामा नागदेवता गहना बनेर रहेका छन्। उहिले समुद्र मन्थनमा नाग देवताकै महत्त्वपूर्ण स्थान थियाे।”
मनाेहरकाे भनाइलाई राेक्दै रूपेशले भन्याे – “त्यसाे भए हजुरबा! अस्ति घरभित्र सर्प पस्याे भनेर लठ्ठीले हिर्काएर नाग देवतालाई किन मार्नुभएकाे त?”