“नारी बिनाको घर”

सुधिर थापा

छन्द :- शार्दूलबिक्रीडित

नारी हाै गहना हरेक घरको आफैँ उज्यालो पनि
आमाको ममता छ काख भरिलो वात्सल्य मीठो अनि
यस्तो मिल्छ कहाँ अपार गुनिलो यो काख न्यानो भर
साच्चै शून्य छ यो बिशाल भवमा नारी बिनाको घर

ढाक्दैछिन् कसरी उठेर जननी आधा त आकाश यो
कालो बादल त्यो हटेन नभमा नारी बिनाको त यो
माटोको ममता गरेर मनमा सन्तान पाल्ने अनि
नारी हुन् धरती सहेर भवमा यो सृष्टि धान्ने पनि

आमा हाै, बहिनी प्रिया मन कतै यी रूप तिम्रा कति
बिग्रेको घर त्यो मिलाइ सबको सारा सुधार्छ्याै मति
लक्ष्मी हाै घरकी अपार मनकी देवी भएरै जहाँ
बल्छ्याै दीप भई हरेक घरमा छर्दै उज्यालो यहाँ

तिम्रो आट सधैं हिमाल जसरी अग्लेर चुल्ने छ यो
तिम्रै त्यो ममता मिलेर घरमा हाँसो खुसी यो भयो
धेरै दु:ख खप्याै सहेर मनमा सन्तान भन्दा अति
तिर्ने हो कसरी अथाह ऋण यो भुल्नै नसक्ने कति

तिम्रो काख बिना बिशाल जगमा बाँच्नेछ को त्यो भन
दिन्छ्याै त्यो ममता समान सबमा कस्तो छ तिम्रो मन
आफैँ छ्याै मनकी अपार धनकी नारी भएरै भर
लाग्ने शून्य छ यो बिशाल भवमा नारी बिनाको घर।