“नारी महिमा”

शोभा कोइराला

वसन्तकी सुन्दर पुष्प नारी
लज्जा भएकी पनि दिव्य नारी
नारी बिनाको घर नै हुँदैन
भए नि त्यो सुन्दर नै हुँदैन।

लज्जा बिनाका पनि देख्छु नारी
सच्चा र अच्छा पनि देख्छु नारी
चियो र चर्चो गतिलो छ अर्को
तथापि नारी बिनु छैन झर्को।

श्रद्धालु मात्रै पनि देख्छु नारी
लज्जालु मात्रै पनि देख्छु नारी
झर्कै नमान्ने पनि देख्छु नारी
स्वतन्त्र खोज्ने पनि देख्छु नारी।

गुणी भएझैँ अभियान गर्ने
निर्दोषलाई अति खेद गर्ने
ढाँटेर सारा मन हर्न खोज्ने
दु:खी छु भन्दै सय घात गर्ने।

गाएर मात्रै महिमा सकिन्न
नारी बिनाको जग हुन्न हुन्न
यस्ता कुराको महिमा सकिन्न
बिगार केही पनि गर्न हुन्न।