निरुत्तरित प्रश्न

एल•बी•बस्नेत
जोरथाङ्ग, द•सिक्किम

विद्यालयबाट जीव-विज्ञान अन्तर्गत ‘मानव-संरचना’ बारे पाठ पढ़ी घर आई पुगेको छोरोलाई ऐना अघि उभिएर एकोहोरो आफ्नो अनुहार हेरिरहेको देखी बाबुले सोधे- “के भो हँ तँलाई ? ठीकै त छस् तँ ?”
बाबुको आवाजले छोरो झसङ्ग तर्सियो। बिस्तारै बाबुपटि फर्केर छोरोले सशंकित भावमा सोध्यो- “बाबा, म तपाईँ कै छोरा हो नि ?”
“हन, के भन्छ यो! अनि कसको छोरा होस् त तँ ?” बाबुको विष्मयपूर्ण सोधाईको जवाबमा छोरोले भन्यो-“हैन, साथीहरुलाई हेर्छु; उनीहरु सबै कतै न कतै आफ्नो आमा-बाबुसँग मिल्दो-जुल्दो छ । कसैको नाक मिल्छ, कसैको ओंठ मिल्छ, कसैको आँखा त कसैको केश। रंग-रुप पनि उस्तै-उस्तै। तर म किन अर्कै ? न तपाईँ जस्तो, न आमा जस्तो नै…।”
छोरोको प्रश्नको उत्तर दिन नसकी बाबु फनक्क फर्कि भान्सा-कोठातिर लागे। छोरो भने उभिई नै रह्यो ऐना अघि प्रश्न-चिह्न बोकेको अनुहारमा उत्तरहरुको मेसो खोज्दै।