“पत्रु खाना”

गंगा खड्का
बूढानीलकण्ठ ,काठमाडौँ

पत्रु खाना खायो भने ज्यान हुन्छ रोगी
भविष्यमा बस्नुपर्छ अति कष्ट भोगी।

खाउन्जेल मीठो हुँदैन केही पोषण
शरीरका तागत गरिदिन्छ शोषण।

चिनी ,नुन ,बोसोको ह्वात्तै बढेर मात्रा
ओखती गर्दागर्दै जीवन बन्छ जात्रा।

चाउचाउ ,चिप्स ,फ्रेन्च फ्राइ अनि पिज्जा
खाँदाखेरि मात्रै एकछिन हुने गर्छ मज्जा।

मसलेदार ,बास्नादार धेरै भुटेका
खाना खाँदा सहनुपर्छ खुसी लुटेका।

पैसा हुन्छ नाश परिवारलाई गाह्रो
पत्रु खाए बेलैमा यमराजको प्यारो।

मधुमेह ,क्यान्सर ,रक्तचापको भय
दूर हुन्छ सधैँलाई स्वच्छ खाना खाए।

जिब्रोलाई भन्दा शरीरलाई गरौँ माया
जीवनमा पर्न नदिऔँ दु:खको छाया।