“परिणाम”

अन्जु शर्मा
रातोपुल

” हे भगवान !! मलाई कुन जुनीको पापको सजाय दिदैछौ? आखिर खाइनखाइ त्यत्रो संपति जोडेको थिएँ,” धन माथिको रातो गेडी”एक्लो छोरो लाडप्यारले हुर्काएको थिएँ, आज ल्याएर वृद्धाश्रममा राखिदियो।”निसे काका वृद्धाश्रमको कोठाबाट बर्बराए।
पुषको महिना कठ्याङ्ग्रिदो चिसो , अशक्त र जर्जर शारीरिक अवस्था। एक सुन्दर र हँसिलो अनुहार गरेकी नर्सले दबाइ खुवाउँदै संझाइन-“उस जुनीको हैन काका! यसै जुनीको कर्मको फल हो । छोरी छ भनेर ६ पटक भन्दा बढी गर्भपतन गराउन काकीलाई दबाब दिनुभएको थियो भनेर मलाई आमाले भन्नुहुन्थ्यो । गर्भपतनको पीडा, मानसिक तनाव र स्वास्थ्यकर खानाको अभावले काकीलाई छिट्टै रोगले लग्यो रे। काका !नारीमाथि त्यति धेरै हिङ्श्रक नबन्नुभएको भए म सँगैका त हजुरका छोरी नै हुन्थे , अनि मैले गरे जस्तै सेवा गर्थे होलान् हैन र ?”
“छोरीलाई त्यति धेरै घृणा गर्नुभयो , आखिर वृद्धाश्रममा आउँदा पनि हेर्नुस् हामी छोरीहरूले नै तपाईंहरूको सेवा गर्दैछौँ।”
नर्सको कुराले निसे काका आँखाभरि आँसु पारेर भक्कानिए।