“पुतलीको हुल”

राधा आचार्य

जताततै ढाकिसक्यो थरी थरी फूलले
फुलबारी रमाइलो पुतलीको हुलले।

छिर्केमिर्के पुतलीले प्वाँख हल्लाउँदै
नाचेका छन् मज्जाले कम्मर मर्काउँदै।

पहेँलो सेतो अनि कालो खैरो रङको
हेर हेर क्या राम्रो! पुतलीको फन्को।

फूलको पत्र पुतलीको गोडा टेक्ने धर्ती
फूलको रस खोजी हिँड्छ उहीँ फर्की फर्की।

बाटुला आँखा खोली के के देखे होला?
पुतलीको हुलले स्वर्ग भेटे होला।