“प्रथमआषाढ”

शोभा कोइराला

तातो हावा अतिशय भयो रोकिने छाँट छैन
आषाढैको प्रथम दिनमै खोज्न केही हुँदैन
लोलाएका लहर लतिका ग्रीष्मले झन् गलेका
पर्दा पानी झमझम गरी उठ्न लाग्छन् ढलेका।

चल्दै आयो विधिगत छ यो फेरिने हुन्छ केही
आषाढैको प्रथम दिनमै लक्षणा हुन्न केही
बालीनाली सुरलयसँगै देखिइन्छन् झुलेका
बेलाबेला पवन पनि ता आत्तिइन्छन् लुकेका।

कान्छो गर्मी प्रकट दरिलो शक्तिशाली अनौठो
आषाढैको प्रथम दिनमै हुन्छ केही सुनौलो
आयो बेला पुलकित हुने भन्दछन् ती कुरेका
मिल्दा ऊर्जा विपुलरसले उड्दछन् ती चखेवा।

वर्षा डाक्ने प्रकृतिपथको मार्गको वाफ सस्तो
आषाढैको प्रथम दिनमै हुन्छ केही त यस्तो
क्वैली मैना चिरविर गरी बास खोज्दै उडेका
लाग्यो आहा!रथिक जसरी दृश्यमा छन् खुलेका।

चर्खा घुम्छन् नियमित सदा ग्रीष्मलाई पुकारी
आषाढैको प्रथम दिनमै हर्षको होस् जुवारी
खोलानाला चउर हरिया औ कुलेसा झरेका
तातो हावा रविशशि खुदै लाग्छ छक्कै परेका।