“बस्नू सबैको मनभित्र नानी”

शान्ति सिग्देल

वसन्तको सुन्दर याम जस्तै
हेमन्तको हार्दिक घाम जस्तै
बुबा र आमा गुरु मन्त्र मानी
बस्नू सबैको मनभित्र नानी।

घमण्ड केही मनमा नपाल्नू
सद्भावको सागर तर्न थाल्नू
उर्जा दिने नन्दनझैँ बिहानी
बस्नू सबैको मनभित्र नानी।

बानी सधैँ अक्षरमा लगाई
र देशको उन्नत गीत गाई
पढ्नू र लेख्नू घर काम धानी
बस्नू सबैको मनभित्र नानी।

सर्वोच्च अग्लो हिमशैल टेकी
कथा तथा गीत र काव्य लेखी
समुद्र जस्तै अति शान्त ज्ञानी
बस्नू सबैको मनभित्र नानी।

किताबको द्वार सबै उघारी
अज्ञानताको लहरो लघारी
तिर्खा हटाएर पिएर पानी
बस्नू सबैको मनभित्र नानी।