“बालदिवस”

तेजप्रकाश श्रेष्ठ

मेरो किताब खै ?
मेरो कापी कलम खै ?
मेरो स्कुल ब्याग खै ?
मेरो स्कुल खै ?
मेरो नाना र खाना खै ?
मेरो घर खै ? मेरा आमाबा खै ?
खै ? खै ? खै ??

चिच्याउॅदै छन् बालबालिका
अस्तव्यस्त छ परिवेश
म किम्कर्तव्यविमुख
भोटेकोसीको बाढी हेरिरहेछु
क्षतविक्षत गाउॅबस्ती देखिरहेछु
म आफै क्षतविक्षत बनिरहेछु ।

म कसरी मनाऊ
बालदिवस ?
बालबालिकाको चिच्याहटमा
कहॅा खोजॅू म
खिल्खिलाहट ?

उद्धार, राहत र पुनर्वास
खोजिरहेछन् बालबालिका !
आँशुमा बॅाच्न विवश छन्
बालबालिका !

गॅास, वास, कपास
बेलैमा जुटाउन लागिपर्न
अपरिहार्य भएको बेला
म कसरी मनाउॅ बालदिवस्?

तैपनि
शुभकामना छ बालदिवस !
आएका छौँ
प्रत्यक वर्ष आए झै
बालबालिकाको
सुन्दर भविष्य निर्माण गर्न
सक्षम होऊ, सफल होऊ !
तब न
बालदिवस मनाउॅदा
बालबालिका
हॅास्न सक्नेछन् नाच्न सक्नेछन्!
अनि पो
बालदिवसको सार्थकता
झल्किने छ।