मुखहेर्ने तरिका

खगेन्द्र बस्याल
तिलोत्तमा ९ सरस्वती पथ,रुपन्देही

एकाबिहानै गुँड छोडेर टाढा गएका छोराछोरीहरुले दैलातुङ्ग फाँटमा आफ्नो बुढोघरको चौकिदारी गरेर बसेका बृद्धबाबु सहदेवलाई भिडियोमा ग्रुपकल गरेर भने, ” दर्शन बुवा! आज हजुरको दिव्य मुहार हेर्ने दिन।हजुर सुखी र दीर्घायु रहनु होस्। अन्नपुर्णेश्वर महादेवले हजुरको कल्याण गरुन् , हार्दिक शुभकामना ।”

ती सवैले टाढा रहनु परेकाले उपहार र फलफूल एवम् मिठाइँ ल्याएर माया दर्शाउन नपाएकोमा आआफ्नो दुखेसो पनि पोखे। अर्को पटक घरमै आउने वाचा समेत गर्न भ्याए।
सहदेवले छोराछोरीलाई भने, ” कति मिठा महनैं बिर्साउने कुरा गर्यौ।मलाई त मिठाइँ र फलफूल खाएभन्दा बढी भयो । तर मेरो हकमा फरक किसिमले मेरो मुख हेरेको देख्ने चाहना छ।त्यो हुन सकेमा तिमीहरूले चाहेझैं म सुखका साथ धेरै बर्ष अवश्य बाँच्ने छु।”
उनका छोराछोरीहरुले एकै साथ भने, ” हजुरले आफ्नो मुख छोराछोरीहरुले कसरी हेरुन् भन्ने चाहनु भएको छ ?”
केहीबेर उनी बोलेनन् । त्यसपछि सवैलाई पालैपालो हेरेर खोकीलाई दवाउने प्रयास गर्दै भने, ” तिमीहरू समाजमा आफ्नो मुख देखाउन लायक बन, त्यतिभए तिमीहरूले चाहेजस्तै सधैंभरि मेरो मुख उज्यालो हुनेछ ।”