“लास्ट बेन्च”

ढाकामोहन बराल
पोखरा ७ मासबार , कास्की

विद्यालयमा धेरै हल्ला खल्ला हुन थालेको थियो । शिक्षक कक्षामा पसे पछि शान्त भएका विद्यार्थी शिक्षक निस्के पछि पुन: हल्ला गर्न सुरु गर्थे । बस्ने ठाउँको लागि ठेलमठेल गरि रहन्थे । सबै कक्षाहरुमा उस्तै समस्या थियो । ” आजभोलि बास बस्न लागेका कागले बाँसको घारीमा हल्ला गरे जस्तो धेरै हल्ला हुन थाल्यो । के भएको हो ? ” प्राचार्यले आफ्नो कार्यकक्षमा सबै शिक्षकको अगाडि भन्नु भयो । ” के गर्नु सर मिलाएर राख्यो । बेन्चमा बस्नको लागि ठेलमठेल गर्न शुरु गरिहाल्छ्न् । ” हरि सरले भन्नु भयो । ” डेक्स बरु अर्को आर्थिक वर्षमा किनौ , बस्ने बेन्च त सबै विद्यार्थीलाई पूरा गरौँ भन्ने सबैको सल्लाह भए भमोजिम खरिद गरेको हो । पुग्दैन र कुनै कक्षामा ? ” उहाँले भन्नु भयो । ” पुगेको छ तर के गर्नु , सबैले एउटै बेन्च ताके पछि ।” निर्मल सरले भन्नु भयो । कुरा नबुझेर प्राचार्यले सबैको मुखमा हेर्नु भयो । ” के गर्नु सर सबै विद्यार्थी मुख्य मन्त्री भएर सफल हुन चाहन्छ्न् । खरिदार भएर के असफल हुनु भनेर सबै लास्ट बेन्चमा मात्र बस्न खोज्दछ्न् । ” हरि सरले प्रस्ट पार्नु भयो ।