“साना हातका चित्रकलामा ठुला सन्देश !”

घनश्याम रेग्मी

नानीहरू चित्र बनाउँदै थिए
धर्सा खिची रङ्ग लगाउँदै थिए
उत्साहका हार्दिक रङ्ग घोलिए
यो देशका सुन्दर मार्ग कोरिए।

रेखा तथा रङ्ग मिलाउँदै
यहाँ इच्छा र आधार खन्याउँदै
त्यहाँ कोर्छन् जहाँ चित्र विचित्रका
कला देखेँ पिकासो हर बालबालिका।

हुन् वृक्ष हाम्रा गतिशील मित्र यी
हावा दिने जीवन धान्न पावनी
दाना दिएका फलफूल सुन्दर
साथी यिनी मानव मात्रका भर।

हाम्रो धरा सुन्दर पार्न घोरिए
यस्तो हवस् भोलि भनेर कोरिए
यी पाठशाला घर गाउँ मन्दिर
पर्या गरौँ हार्दिक चित्रझैँ स्वर।

रोपौँ यहाँ फूल धरा सजाउन
लागौँ सबैले धरती बचाउन
सन्देश राम्रो छ दिने प्रसङ्गले
धर्ती सजाऔँ बिरुवा फलान्नले।

बाटो तथा सत्तल जो बढार्दछन्
फोहोर ती मोहर बन्न सक्तछन्
मान्छे चरा बोट र फूल पातमा
सम्बन्ध उस्तै दिन साँझ रातमा।

यी पाठशाला सब यज्ञका स्थल
खोला र नाला जरुवा सफा जल
हामी बचाऔँ र बचौँ सँगसँगै
हाँसौँ यिनी साथ सबै सँगसँगै।

धर्ती सफा सुन्दर राख्न जानिए
साझा यही बास भनेर ठानिए
अर्को कहाँ स्वर्ग छ खोज्न पर्दछ
यो धारणा सोच बसाल्नु पर्दछ।

खाल्डो खनेँ बोट तिमी लगाउनू
माटो दिएँ तोय तिमी सिँचाउनू
आनन्द सौन्दर्य यहाँ चियाउँछ
नौलो बिहानी तब खुल्न आउँछ।

उद्योग वातावरणीय चाहिने हावा
सफा स्वच्छ सुरम्य पाइने पानी
बचाऔँ सब जीवको भर
धर्ती यही हो सब जीवको घर।