युगल बसेल
सन्धिखर्क तुम्कोट
टुकुर टुकुर टुकुर टुकुर मेरो आँगनैमा
हिँड्छन् बाबु मिठो हाँसो सँगाली ओठैमा।
बुबु, माम,चिची,पापा यिनको भाषा बोली
कस्तो फूल फक्रिएला यो कोपिला भोलि ?
यी आँखामा कस्ता होलान् सपना सुनौला ?
यिनका पाइला हिँड्ने बाटा कहाँ खन्ने होला ?
सुनको खानी भेटिन्छ कि हिराको भण्डार ?
कसले कस्तो फड्को मार्छ, कसलाई थाहा छ र ?
यो जिब्रोले कस्तो देला खबर, सन्देश ?
यी औँलाले कस्तो रङमा रङ्गाउलान् देश ?
सानो मगजले बुन्ला ठूला तानाबाना
पौरखीलाई कहाँ छेक्न आउँछ र सिमाना ?
सलाम थापे, तारिफ थापे, भरे आफ्नो झोली
मुलुकको सान-मानमा ल्याए है, उँभौली।
