कमल प्रसाद बगाले रेग्मी
वालिङ्ग बजार स्याङ्जा
लौ पञ्चे बाजा बेसरी बज्यो त्यो गैरी खेतमा
जुटेर सबै गाउन थाले अपूर्व भेटमा,
हातमा बीउ लिएर सबै नाच्न पो थाल्दैछन्
मिलाई ताल हिलोमा नाच्न खुट्टा नै चाल्दैछन्
दही र चिउरा लिएर आमा आलीमा बसेकी
भर्खरै मात्र आएर यहाँ हिलोमा पसेकी,
लगाई दिए हिलोको टीका समाई आमालाई
हिलो नै छ्यापी डुबाई दिए ती हाम्रा बाबालाई,
बाजाको ताल खुट्टाको चाल रमाई नाच्दैछन्
रमाई निकै उपस्थितहरु खुसीले हाँस्दैछन्,
असारे गीत गाएर वाली दही चिउरा खाएर
नाच्न पो थाले आगन्तुक पनि हिलोमा आएर,
वर्षको चाड नेपाली माझ छ शुभकामना
नेपली हामी सदैव रहोस पवित्र भावना।
