“अदृश्य शक्ति साधना”

177

मधु घिमिरे
हेरिस्वर्ग, पेन्सिलभेनिया,अमेरिका

छन्द-प्रमाणिका

हिँडेर मार्ग पाउले
पुगिन्छ चुम्न टाकुरा
गरेर कर्म हातले
खनिन्छ जिन्दगी गरा।

प्रभातको सुवासमा
झलल्ल छन् सुभावना
प्रभातको सधैँ गरौँ
सुसम्झना र प्रार्थना।

अनेक रूप रङ्गमा
र लोभ भोग द्रव्यमा
नराख्नु दुष्ट भावना
पराइ इष्टमित्रमा।

जताततै छ ज्ञानको
अपार मूल सम्पदा
अनन्तता छ व्योममा
खुसी छ भित्र चित्तमा।

विचारमा विवेकमा
परोपकार पुण्यमा
सदैव फुल्छ जिन्दगी
प्रयासको बगानमा।

हजार लाख सम्पति
अनर्थ बन्छ अन्तमा
छ मूल कर्म मुक्तिमा
अदृश्य शक्ति साधना।