अवतार ढकाल
`म्याम भुत हुन्छ कि हुँदैन् ?´ कक्षामा अर्कै विषयबस्तु पढाइरहेकी रेनुका मिसलाई सजलले सोध्यो।
`हुँदैन।´ रेनुकाले उत्तर दिइन्।
`उसले पत्याएन तर पनि चुप लाग्यो।
`अनि बोक्सी नि म्याम?´ सरिनाले अर्को प्रश्न तेर्स्याइ।
`हुन्न।´ उनले एक शब्दमा जबाफ दिइन्।
`भुत, प्रेत, बोक्सी….यी सब अन्धविश्वास हुन। हामी अन्धविश्वासको पछि लाग्नु हुँदैन।´ उनले सम्झाउँदै भनिन्।
कक्षामा एकछिन खासखुस चल्यो। विद्यार्थीहरू एकअर्कालाई हेरेर मुखामुख गर्न लागे।
`ओइ भन न।´ एउटा आवाज सुनियो।
`ह्या। म भन्दिन, तैं भन।´ अर्को आवाज आयो।
रेनुकाले कसको आवाज भन्नें ठम्याउन सकिनन्।
`अनि म्याम हिंजो तपाईँको घरमा किन चिन्ता राखेको ?´ उनकै छिमेकमा बस्ने एउटी नानीले भनिन्। रेनुकाले केहि बोल्नै सकिनन्। कोठाभरी हाँसो गुन्जियो।
`चुप लाग। हल्ला नगर। जाँचमा आयो भनें `हुँदैन´भनेर लेख्नु पर्छ।´उनले अलिक मधुरो स्वरमा भनिन्।
