माहेश्वरी भट्ट
कञ्चनपुर
“मोबाइल खोस्ने अधिकार कसले दियो ?” “विद्यार्थीमाथि हिंसा गर्ने शिक्षिकालाई कारवाही गर । ”टेबलमा फ्याँकिएको मोबाइलमा भिडियो बोलिरहेको थियो।
कक्षा सुरु हुनुअघि विद्यालयमा असामान्य चहलपहल थियो । शिक्षिका भने भीडको अघिल्तिर मौन थिइन्। भिडियो दोहोरिँदै थियो, जहाँ उनी एक विद्यार्थीको हातबाट मोबाइल खोसिरहेकी थिइन्। एकै घण्टामा सामाजिक सञ्जाल न्यायालय बनेको थियो।
“यस्तीलाई पढाउने अधिकार छैन !” “यो त अत्याचार हो!”
भीड बोल्दै थियो । शिक्षिका अझै मौन थिइन्।
केही समयपछि प्रधानाध्यापकले सीसीटीभी फुटेज खोल्न आदेश दिए। उपस्थित सबैले फुटेज हेरे । फुटेजमा जुन दृश्य देखियो त्यसले सबैको बोली बन्द भयो । सबैमा पछुतो र ग्लानीको भाव छायो । वातावरण स्तब्ध भयो।
परीक्षा सञ्चालन भइरहेको बेलामा एउटा विद्यार्थी मोबाइलबाट चिट गरिरहेको र अरूलाई पनि चोर्न उक्साइरहेको थियो । शिक्षिकाले रोक्न खोज्दा उनीमाथि विद्यार्थीले कुर्सी प्रहार गर्न खोजेको स्पष्ट चित्र फुटेजमा देखिएको थियो।फुटेज हेरिसकेपछि प्रधानाध्यापकले भारी स्वरले प्रतिक्रिया दिए, “हामीले काटिएको दृश्यको आधा भागलाई सम्पूर्ण सत्य ठानेछौँ।”
