कृष्णशरण उपाध्याय पौडेल
छन्द : उपजातिवंशा
गर्मी बढेमा पतिना त हो सुधा
हुँदैन गर्मी पतिना सँगै हुँदा
यो हुन्छ आस्वाद्य निकै सुगन्धित
आरोग्यदायी र मनो – विनोदित।
छ सात पत्ता पतिना टिपीकन
राखौँ सुराही जल मा जुनै दिन
चौबीस घण्टापछि नै पिऔँ जल
बनौं सुखी , प्राण गरौं सुशीतल।
महौषधी हो पतिना अचम्म को
हो मित्र यो जीवन आयु सम्म को
छ हप्प गर्मी, पसिना छ खल्खल
पिऔँ न चीसो पतिनामयी जल।
पचास पत्ता पतिना पिसी लिए
इलाइची सोंँप मिलाउँदै पिए
गर्मी सँगै लू पतिना भगाउँछ
चुस्ती र फुर्ती तन मा जगाउँछ।
सब्जी बनाई पतिना मिसाउनू
घोटेर मुन्टा चटनी बनाउनू
थिची पिसी आँप जिरा मिलाउनू
र नून हाली रसिलो बनाउनू।
खायौँ भने यो अझ भोक लाग्दछ
अजीर्णता नास्दछ रोग भाग्दछ
चाट्नू यही भोजन साथ सर्वदा
निरोग या स्वस्थ बनौँ सदा सदा।
