कमला घिमिरे अधिकारी
संसार हेर्ने आँखाको नानी हुनुपर्छ,
अहंकारी, दुष्ट होइन ज्ञानी हुनुपर्छ।
सबैकुरा ओगटेर बस्नु नराम्रो हो,
बाँडी खाने, हाँस्ने, खेल्ने बानी हुनुपर्छ।
लोभि, छुच्चो भयो भने गर्छन् तिरस्कार,
मिलनसार र दयाको खानी हुनुपर्छ।
ठुलालाई आदर गर्नु, सानाको ख्याल,
सबैको माया पाउन ज्ञानी हुनुपर्छ।
समयको ख्याल राखि गर्नुपर्छ काम,
कर्तब्यमा लगनशिल र ध्यानी हुनुपर्छ।
जुध्नुपर्छ समय र परिस्थिति सँग,
कहिले हावा, कहिले घाम-पानी हुनुपर्छ।
