“असार पन्ध्रको नाटक”

साबित्रा शिवाकोटी

असार पन्ध्र आयो फेरी, हिलोमा फोटो खिच्ने दिन
एकदिन किसान बनेर सजिन्छ,सञ्जालिय फोटो फिरेम।

हातमा बीउ,मुखमा हाँसो, क्यामेरातिर नजर
खेतमा पसिना बगाउने भन्दा,नौटङ्कीको चल्दछ प्रचार।

किसान वर्षभरि झुल्दछन् घाम-पानी नभनी अभावमा
सम्झना आउँछ उनीहरूको एउटै दिनको प्रभावमा।

दही,चिउरा,गीत र नाचले सामाजिक सञ्जाल भरिन्छ
हिलोमा असार पन्ध्रको नाटक एकदिनमा सकिन्छ।

असार पन्ध्रको नाटकमा पात्र धेरै कथा उस्तै
किसानको दु:ख ओझेल पार्दै बज्दछन् ताली सँगसँगै।

जबसम्म किसानको सम्मान एकदिनमा मात्र सिमित रहन्छ
त्यतिबेला सम्म असार पन्ध्र उत्सव भन्दा प्रश्न नै बनिरहन्छ।