“आमा”

राधा आचार्य

साक्षात् छौ जगमा अपार जननी आएर हाँसो छर्यौ
माता हौ शिरमा थपक्क सबका राखेर हातै धर्यौ
देऊ आशिष जिन्दगीभरि अहो! तिम्रो पथैमा हिँडूँ
आफू चालक वर्तमान म बनूँ उत्साह भर्दै जितूँ।

राखेको मनमा सजावट भरी तिम्रा अनौठा कुरा
बुझ्ने गर्छु तिनै मिठासभरिका अर्थ्याउने हो चुरा
साँचोमा कुन हो अमूल्य कृतिका जान्नै नपर्ने भयो
आमा हौ सबकी सखी पनि तिमी कस्तो अचम्मै अहो!

हावा चल्छ सरर्र वेग गतिलो गाइन्छ गाना स्वयम्
आमाको घर भावना छ गतिलो नाचिन्छ आफू स्वयम्
हाँस्दै छिन् थपडी बजाइ रसले सन्तान गद्गद् हुँदा
आमाको मन थामिइन्न यसरी धर्केर हामी रूँदा।